Kreml nezaretindeki Qırım akimiyeti 2014 senesi aprel ayından başlap 2018 senesi sentâbr ayında qadar yarımadada barışıq toplaşuv serbestligini daa ziyade sıñırlap, bu müddet içinde 353 insannı memuriy mesüliyetke çekti. Bu aqta «Qırım aq qorçalayıcı gruppasınıñ» saytında derc etilgen infografikada bildirile.
Gruppanıñ malümatına köre, 12 insan cinaiy mesüliyetke çekildi.
«Olardan: «fevral 26 davası» boyunca 8 üküm çıqarıldı: 1 üküm – siyasiy munaqaşalar neticesinde azat etilgen Ahtem Çiygoznı 8 yıl sert rejimli koloniyada qaldırmaq qararı, 7 üküm şartlı apis cezasınıñ berilmesinen bağlıdır», – dep aytıla esabatta.
Qırım «qadıları» 367 kere memuriy mesüliyetke çekme qararını da çıqarğan edi, 334 qarar umumen 3,95 million rublelik (tahminen 1,7 million ğrıvnâ – QA) para cezalarınıñ tayin etilmesinen bağlıdır.
«Barışıq toplaşuvlarnıñ iştirakçileri memuriy tevqif cezalarını (eñ az 22 qarar) ve cemiyet işleri (11 qarar) alğan edi», – dep bildire aq qorçalayıcılar.
Rusiye uquq qoruyıcıları sentâbr ayında işğal etilgen Qırımda 5 tintüv keçirip, qırımtatarlarğa qarşı 7 memuriy iş açtı. Mahkemeler olarğa 2000 ruble (855 ğrıvnâ – QA) para cezasını tayin etip, umumen 27 kün memuriy tevqif cezasını berdi.
Qırımtatar Milliy Meclisiniñ reisi Refat Çubarov Jenevada BM insan aqları şurasınıñ 39-ıncı sessiyasında çıqışta bulunıp, Qırım yarımadasında barışıq toplaşuv, birleşüv, din ve areket aqları bozulğanını qayd etti.
İnsan aqları ve halqara gumanitar aqqı saasında bozuvlarnı qayd etken BM Monitoring missiyasınıñ reisi Fiona Freyzer, soñki 10 ay devamında yarımadada insan aqları vaziyeti deñişmegenini bildirdi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
