2023-2024 oquv yılında balalarnıñ tek yüzde 0,8%-iniñ Qırım mekteplerinde ukrayin tilini ögrenmek imkânı bar edi, dep bildirdi "Almenda" vatandaş maarifi merkeziniñ reisi Mariya Sulâlina "Qapqanğa tüşken balalıq: işğal altındaki balalarnıñ aqlarını nasıl qorçalamaq" matbuat konferentsiyası vaqtında.
Bunen beraber, Sulâlina qayd etti ki, Rusiyeniñ balalarnıñ "vatanperver terbiyesi" içün büceti 2024 senesi 477 million dollarnı teşkil etti, bu ise, 2022 senesine nisbeten aman-aman 10 qat ziyadedir.
Ukrayina Baş prokurorınıñ balalarnıñ menfaatlarını qoruv ve zorbalıqqa qarşılıq departamentiniñ yolbaşçısı Yuliya Usenko, Rusiyede tasilniñ askeriyleştirilüvi devlet strategiyasınıñ bir qısmı oldı, dep bildirdi.
"Rusiye Federatsiyasınıñ tasil sisteması, 2016 senesinden başlap, hususan arbiy komponent, ya da "yunarmiya"lar, tasilniñ mecburiy bir qısmı olğanından soñ, büyük deñişmelerge oğradı. 2023 senesi Rusiye akimiyeti 2030 senesine qadar arbiy-vatanperver terbiye strategiyasını qabul etti, onıñ maqsadı 15 million balağa irişmek", — dep qayd etti Usenko.
Onıñ aytqanına köre, bu balalarnıñ 10% Rusiye arbiy-siyasiy reberliginiñ ğayesine köre, RF Silâlı quvetleri içün yedek olmaq kerek.
"Bu siyaset, öz devleti, halqı ve atta tuvğanlarına qarşı cenkleşecek balalarnı terbiyelemege doğrultılğan", — dep qayd etti Usenko.
Daa evel Ukrayinanıñ halqara teşkilâtlar yanındaki Vena daimiy temsilcisi Yevgeniy Tsımbalük OSCE Varşava konferentsiyasınıñ açılışında çıqışta bulunıp, Qırımda 45 biñge yaqın bala "Yunarmiyada" ve Rusiye vatanperver terbiyesi ile bağlı diger teşkilâtlarda buluna, dep bildirdirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
