Qırım aq qorçalayıcı gruppası Aqmescitte «Yunarmiya» («Genç askerler») azaları içün keçirilgen «başlanğıç desant azırlığı» dersini takbih ete.
«Balalarnı paraşütni toplamağa ve kiymege, «şahsiy silânı qoymağa» ögrettiler. Rusiye akimiyetiniñ böyle dersleri balalarnıñ cenk kultunı ve zorbalıq tolerantlığını inkişaf ettirmege yardım ete. Rusiye akimiyeti böyle tedbirlerni qullanıp, Qırımnıñ çağına yetmegen sakinleri arasında arbiy propaganda keçire, böylece, olarnı Rusiyede askerlik yapmasına azırlay, bu ise halqara gumanitar uquqı normalarınıñ sert bir bozuvı ola», – dep aytıla aq qorçalayıcılarnıñ haberinde.
Tedbir keçirilüvi aqqında yanvarniñ 10-nda «Aqmescit Yunarmiyası» matbuat hızmeti bildirdi. Berilgen malümatqa köre, genç askerler «zemaneviy paraşüt sistemaları, paraşütni toplav usulları ve şahsiy silânı qoyuv usullarınen» tanış oldı.
Ukraina aq qorçalayıcıları, işğal etilgen Qırımda balalarnıñ terbiyesinde cenk mevzusı bar olğanına çoq diqqat celp etken edi. Psihologlar zemaneviy Rusiye tasilinde balalarnıñ aqlına basqı yapıla, dep qayd ete.
«Yunarmiya» areketi Rusiye Mudafaa nazirliginiñ teşebbüsinen ve Rusiye prezidentiniñ desteginen qurulğan edi. 11 yaşından 18 yaşına qadar mektep talebesi «Yunarmiyanıñ» azası ola bile. Bu areket Qırımda 2014 senesi Rusiye yarımadanı işğal etken soñ inkişaf etti.
