Aqmescitte sentâbrniñ 29-nda «Ana-babalarnıñ teşebbüsi» adlı Qırım cemaat birleşmesiniñ tesis konferentsiyası olıp keçti. Bunı Qırım insan aqları bağ gruppasınıñ koordinatorı Abdureşit Cepparov Qırım.Aqiqatqa haber etti.
«Sentâbrniñ 29-nda «Ana-babalarnıñ teşebbüsi» cemaat birleşmesiniñ tesis konferentsiyası keçirildi. Bu birleşme tasil meselelerinen oğraşacaq. Qırımnıñ bütün rayonlarında çalışmağa planlaştırıla. Bu müim bir iş, ilk evelâ qırımtatar balalarınıñ ana tilinde tasil ala bilmesi içün yapılacaqtır», – dep tarif etti Cepparov.
Aq qorçalayıcı qayd etti ki, birleşmeniñ iş yönelişlerinden biri mekteplerde qırımtatar tilinde ders alacaq sınıflarnıñ açılmasına yardım etmek olacaq.
Tedbirde Ukrain medeniyet merkeziniñ temsilcileri de bar edi. Olar Qırım mekteplerinde ukraince tasil alma vaziyeti içün qasevetleneler.
İlhaq etilgen Qırımnıñ tasil müessiselerinde qırımtatar ve ukrain tilinde ders berüv ve ögrenüv ana-babalarnıñ arizaları esasında kerçekleştirile.
Ukrain medeniyet merkeziniñ faali Leonid Kuzminniñ malümatına köre, yarımadada işğalden evel olğan 7 ukrain mektebinden bir danesi bile qalmadı.
Qırımtatar Milliy Meclisiniñ azası Eskender Bariyev, qırımtatar tilinde tasil bergen 16 mektepten yarımadada tek 7-si qalğanını bildirgen edi.
Aynı vaqıtta, yarımada işğalinden soñ qabul etilgen «Qırım Cumhuriyeti anayasasınıñ» 10-uncı maddesi qırımtatar, ukrain ve rus tillerine devlet tili statusını bere.
Ukraina tasil ve ilim naziri Liliya Grınevıç, Rusiye ilhaq etken Qırımda ukrainler ve qırımtatarlarnıñ ana tilinde tasil alma aqqı bozulğanını qayd etken edi.
