Rusiye kontrolindeki Qırım Yuqarı mahkemesi Bağçasaraydaki «Hizb ut-Tahrir davasınıñ» daa eki mabüsi Memet Belâlov ve Marlen Asanovnı nezaret altında tutuv müddetleriniñ uzatılmasına qarşı itiraz arizalarını red etti. Olar 2018 senesi dekabrniñ 9-na qadar nezaret altında qalacaqlar.
Qırım.Aqiqat mühbiri bildire ki, oturışuv qapalı şekilde keçirildi, Asanov ve Belâlov video bağı vastasınen iştirak etti.
Marlen Asanovnıñ ömür arqadaşı Ayşeniñ Qırım.Aqiqatqa bildirgenine köre, «advokat tayin etilgen edi». Memet Belâlovnıñ advokatı Edem Semedlâyev mabüsnen beraber SİZOdan iştirak etkenler.
«Tercimannıñ aytqanına köre, Marlen qarar seslendirilgende soy-soplarnıñ kirmesine izin bermege rica etken edi, faqat prokuror bu muracaatqa qarşı narazılıq bildirdi, ve mahkeme qararnı qapalı şekilde seslendirdi», – dep qoştı Ayşe Asanova.
Qırımnıñ Yuqarı mahkemesi advokatlarnıñ Bağçasaraydaki «Hizb ut-Tahrir davasınıñ» diger mabüsleriniñ tevqif müddetini uzatmaq qararına qarşı itiraz arizalarını red etti.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
2018 senesi mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı «Hizb ut-Tahrir işinen» birleştirildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
