Kreml kontrolindeki Qırım Yuqarı mahkemesi fevralniñ 8-nde Bağçasaraydaki «Hizb ut-Tahrir davası» dört mabüsiniñ nezaret altında qaluv müddetini aprelniñ 9-na qadar uzattı. Bu aqta «Qırım birdemligi» cemaat teşebbüsini Facebook saifesinde haber ete.
«Mahkeme oturışuvları bitti. Server Zekeryayev, Marlen Asanov, Memet Belâlov ve Seyran Saliyevniñ apiste qaluv müddeti 2019 senesi aprelniñ 9-na qadar uzatıldı», – dep aytıla haberde.
Faallerniñ bildirgenine köre, mahkeme qapalı şekilde keçirildi.
«Dindaşlarına qoltutmaq içün mahkeme binasına kelgenlerniñ yanına politsiya hadimi çıqtı. «Başlığıñız kim» dep sorağanda «Bizde başlıq yoq» cevabını aldı, hadim mahkeme azbarını terk etmege rica etti, çünki mahkeme oturışuvları qapalı şekilde keçirilecek eken. Mahkeme binasına mahkümlerniñ tuvğanları bile kirsetilmedi», – dep bildire faaller.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
