Kreml nezaretindeki Aqmescit Merkeziy rayon mahkemesi, qırımtatar faali Edem Bekirovğa qarşı açılğan cinaiy davanıñ baqılışını oktâbr 7-sine deñiştirdi. Bekirovnıñ advokatı İslâm Velilâyev ise, müşterisi Kyivde tedaviylevde olğanını mahkemege bildirdi, dep haber ete Qırım.Aqiqat mühbiri.
Advokat, mahkeme oturışını eñ azından bir ayğa keççe yapmağa muracaat etti.
"Bizge, advokatlarğa belli olmağan devletlerara añlaşma neticesinde, müşterim şimdi Kyivde buluna. "Feofaniya" hastahanesinde oña yürek ameliyatı yapıldı. Menim malümat talabıma ekimler, reabilitatsiya devamlı olacaq, dep cevaplandılar. Onıñ içün diñlevlerni eñ azından bir ayğa keççe yapmağa rica etem. Kelecek sefer de o kelip olamasa, biz olmamazlıqnıñ sebebini añlatqan vesiqalarnı kösterirmiz", - dedi mahkemede Velilâyev.
Mahkemeciniñ, Bekirov mahkeme protsessinde iştirak etmege isteymi, sualine, advokat: "Elbette ki", dep cevaplandı.
"Müşterim oturışlarda iştirak etmege istey ve öz qabaatsızlığını tasdıqlamağa niyetlene. Biz, onıñ qabaatsız dep tanılğanını bekleymiz", - dedi Velillâyev.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
