Qırımnıñ Yedi Quyu rayonındaki yolda yolcu avtobusı endekke «uçıp ketti», neticede bir insan elâk oldı, sekiz kişi farqlı yaralar aldı. Bu aqta Qırım kütleviy haber vastaları Qırımdaki Rusiye İç işler nazirliginiñ matbuat hızmeti bergen malümatqa esaslanıp bildire.
«Bugün saat 17.30-da Keriç – Kefe yolunda Keriç – Yanış Taqıl (Zavetnoye) seferini kerçekleştirgen 20 kişilik «Bogdan» yolcu avtobusı endekke tüşti. Yol qazasınıñ ilk sebebi – çananıñ bozulmasıdır. Avtobusta aydavcıdan ğayrı 8 yolcu bar edi, olar arasında balalar yoq edi. Yol qazası neticesinde bir kişi elâk oldı, bir insan ağır yaralandı, yedi kişi orta seviyeli yara aldı», – dep tekrarlay politsiyanıñ malümatını «Krıminform» haber agentligi.
Yol qazası yerinde GİBDD hadimleri çalışa. Berilgen malümatqa köre, qazanıñ sebepleri, naqliyat vastasınıñ saibi ve yolcu avtobusınıñ marşrutqa çıqması içün tehnik netice çıqaruvınen bağlı qarar ögrenilmekte.
Qırımdaki Rusiye İç işler nazirliginiñ saytında yol qazası aqqında malümat yoq.
2018 senesi dekabr ayında Qırım qurtarıcıları Qırımda ciddiy yol qazalarınıñ sayısı arttı, dep bildirgen edi.
