Canköy köyüniñ Rus Qaranğut (Timirâzevo) köyünde avgustnıñ 2-sinde saba Qırımtatar Qurultayınıñ delegatı Rustem Ennanovnıñ yegeni Elmar Kurtseitov öldürildi.
Qırım.Aqiqatqa tafsilâtnı qırımtatar faali Zair Smedlâ aytıp berdi.
Oña köre, Kurtseitovnı yaş qızı ögünde öldürdiler. Oña av tüfeginden eki kere qomşusı attı. Bundan soñ qatil öz aranı, maşnanen garajnı ve evine yaqıp, özüni öldürdi.
"Bu saba saat 5:00-6:00-da edi. O, çıqtı. Birden eki kere attı. Bir kere sol közüne attı. O, birinci atuvdan endi ölgendir, dep belleymiz. Ekinci kere - köksüne", - dep ikâye etti Smedlâ.
Onıñ aytqanına köre, tahmin etilgen qatil bir özü yaşay edi ve onı rusiy hastalığı bar edi. Amma buña baqmadan, dep ayta faal, Rusiye politsiyası onıñ qayd etilgen tüfegini tutıp almadı.
"Adamnıñ asıl aqıl ceetten hasta edi. Daima bir pahıllıq duyğusı bar edi. "Mına, sen yaşsın, amma eviñ menimkinden büyük, maşnañ menimkinden yahşı... Sen menden hırsızlaysıñ, şeftali hırsızlaysıñ..." Bütün evi közetüv kameralarınen donatılğan edi. O bir qaç kerek arizalar yaza edi, politsiyanı çağırta edi, olar baqa edi, bu uydurmalar olğanını köre edi. Politsiya, onı aqıldan zayıf bir adamnı kibi köre edi. Amma buña baqmadan silâsını tutıp almadılar. Silânı tutıp almaq içün, psihologik ekspertizanı yapmaq kerek edi. Bunıyapmadılar", - dep qoştı Smedlâ.
Vaqia yerinde Kreml nezaretindeki Rusiye Tahqiqat komitetiniñ hadimleri ve Qırımnıñ rusiyeli politsiyası çalışa.
"Qırımda şimdi hucur bir şey olıp tura: aqıldan hasta adamlar azatlıqta buluna, adamları dompuzlay bile, öldüre bile, amma sağlam adamlarnı psihiatrik hastahanelerge qoyalar ya da orduda hızmet etmege istemegenleri içün, Qoran ve Muqaddes Kitapnı oquğan ve kütkenleri içün apis etelerQ", - dedi Smedlâ.
Elmar Kurtseitovnıñ cenazesi cumaertesi künü, avgust 3-ünde olacaq.
