Qırımda altı yañı koronavirus hastası qayd etildi, hastalanğanlarnıñ umumiy sayısı - 712 adam, dep bildire Qırımnıñ Rusiye yolbaşçısı Sergey Aksenov.
Onıñ malümatına köre, dört hasta qırğılıq ile küreş tedbirleri, 2 hasta sağlam insanlarnıñ skriningi neticesinde ve 1 kişi tibbiy yardım içün muracaat etkende qayd etildi. Hastalar hastahanege alındı, alâqada olğanlar belli, olarğa qarşı profilaktika tedbirleri keçirile.
Tünevin bütün yarımadada umumen 17589 adam koronavirus infektsiyasına teşkerildi.
Ukrainada iyülniñ 3-üne qadar 46 763 COVID-19 hastası qayd etildi, 1212 adam vefat etti, 20 558 hasta yahşı oldı.
Dünyada 10,9 millionğa yaqın koronavirus hastası qayd etildi. 521 298 adam vefat etti, 5,7 milliondan ziyade adam yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
