Avgustnıñ 9-nda işğal etilgen Qırımnıñ Saq rayonınıñ Novofedirivka qasabasındaki Rusiye arbiy uçaq alanında yüz bergen patlavlar rusiyeliler arasında telâş çıqardı. Bunı "QırımSOS" aq qoruyıcı teşkilâtınıñ reisi Denis Savçenko bildirdi.
"Kerçekten de patlavlar anda yaşağan ya da işğal etilgen Qırımda raatlanğan rusiyeliler arasında ciddiy telâş çıqardı. Resmiy şekilde tahliye anda ilân etilmedi. Novofedirivka ve arbiy uçaq alanınıñ yaqınlarında yerleşken Mıhaylivkağa al-azırda kirmek mümkün degil, çıqmaq ise andan mümkün", - dedi Denis Savçenko.
Resmiy tahliye ilân etilmegenine baqmadan, adamlar kütleviy şekilde Novofedirivka, Mıhaylivka ve Saqtan ketip başlağanlar. Bundan sebep yollar maşnalarnen tıqalıp qalmağa başlağan. Kevzlev-Aqmescit yolunda da maşnalar tıqalğanlar.
"Ayna zamanda, Qırımdaki dostlarımınıñ malümatına köre, telâş ve tıqanıqlarğa baqmadan Qırım köpründe ciddiy meseleler çıqmağan", - dedi Savçenko.
Avgustnıñ 9-nda Qırım ve Rusiye kütleviy haber vastaları, telegram kanalları Novofedirivka qasabasında (Saq) uçaq alanında patlavlar oldı, dep bildirdi.
Qırımnıñ Rusiye yolbaşçısı Sergey Aksenov adise yerine bardı. Rusiye akimiyeti «yaqın evlerden» 30 insan tahliye etildi, dep bildirdi. Umumiy tahliye olmadı.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına Mudafaa nazirligi Novofedirivka qasabasındaki Rusiye arbiy aerodromında patlavlarnı izaatlap, müessise «yanğın sebeplerini bilmey», dep qayd etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
