Aqmescit civarındaki Dubki – Levadki yolunıñ çeti tren yolları üstündeki köpür yerinde eşildi, dep bildire Qırımnıñ kütleviy haber vastaları.
«Krıminform» Qırım neşiri yazğanına köre, yolnıñ bu qısmını iflâsqa oğrağan «Sibavtoban» şirketi qurdı.
«Bu yolnı «Sibavtoban» qurdı, «VAD» şirketiniñ onıñ qurucılığına ve areket başlatılğan soñ qayd etilgen hatalarğa alâqası yoq», – dep tarif etti neşirge «VAD» şirketiniñ matbuat kâtibi Grigoriy Nazarov.
Bu yolda ekinci eşilüv oldı. «Bu sefer, keçken sefer kibi, eşilüvniñ üstüni tez örtkenler. Amma yañı qurulğan yolda topraq ve köşeli çaqıl yuvulğan yerler çoq, çetlerde ise çuqurlar peyda oldı», – dep bildire Crimean Tatars.
Qırım nazirligi saytında yañı eşilüv aqqında malümat yoq.
Bu yoldaki omrav aqqında noyabrniñ 10-nda haber etilgen edi. O sefer eşilüv uzunlığı 7,5 metr edi, köpür altında polimer ağı topraqtan ayırıldı ve suv tutqan inşaatlarnıñ betonları töküldi.
Aqmescit civarındaki Dubki – Levadki dört yolaqlı yolunıñ qurucılığı 2017 senesi fevral ayında başlandı, 2019 senesi fevralniñ 7-nde yol açıldı. Yañı yol qurucılığınıñ fiyatı añlaşmağa köre 6,14 mlrd ruble oldı.
