Qırımda iyülniñ 25-nde saba tünevin Aqmescit rayonınıñ Mamaq (Stroganovka) köyünde ğayıp olğan üç yaşında Musa Suleymanovnı qıdırmağa devam eteler.
Aq qorçalayıcı Lutfiye Zudiyevanıñ aytqanına köre, Mamaq qasabasında oğlançıqnı qıdıruv operativ ştabı saat 8:30-da yañı qıdıruv taqımlarınıñ toplaşması aqqında ilân etti.
«Saat 3:00-larda balanı qıdırmağa devam eteler. Coyulğanından doquz saat keçti. Beş kilometr radiusı baqıldı. Qıdıruv yerinde çoq insan bar. Qomşu Bavurçı (Kamenka) qasabası rayonına qıdıruv taqımı kete. Bala ğayıp olğan Mamaqta Fevqulâde vaziyetler nazirligi qasabanıñ bütün azbarlarını baqıp çıqmağa izin berdi», – dep haber etilgen «Qırım birdemligi» cemaat teşebbüsiniñ Facebook saifesinde.
Hatırlatamız, Qırım ve Aqyardaki Rusiye Tahqiqat komitetiniñ idaresi üç yaşında Musa Suleymanovnıñ iyülniñ 24-nde Aqmescit civarında Mamaq köyünde ğayıp oluvınen bağlı cinaiy dava açtı.
Daa evel berilgen malümatqa köre, balanı qıdırmaq içün Rusiye politsiyasınıñ hadimleri, kinologlar, Qırımdaki Rusiye Fevqulâde vaziyetler nazirliginiñ vekilleri ve «Liza Alert» teşkilâtınıñ göñüllileri celp etildi.
Coyulğan oğlançıq – cemaat jurnalisti, Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ oğludır.
