Qırımda aprelniñ 1-nde aqşam koronavirus yuqunçınıñ tarqaluvınen bağlı yañı sıñırlavlar ilân etildi. Bu aqta yañı sıñırlav tedbirlerine dair buyruq derc etilgen soñ açılmağan Qırımnıñ Rusiye ükümetiniñ saytı bildire.
Böylece, aprelniñ 3-nden 6-na qadar vatandaşlar yaşağan (bulunğan) yerlerinde qalmalı. İstisnalar:
- acele tibbiy yardım istemesi;
- eñ yaqın tükânğa baruv;
- evden 100 metr mesafege köpekni çıqaruv;
- çöplükni çıqaruv.
Akimiyet teşkilât faaliyetini toqtatmağan olsa, işke baruv da istisna ola.
Bundan evel Aqyar sakinlerine acele bir şey olmasa, evden çıqmaları yasaq etildi. Aqyarda yahta ve katerlernen deñiz kezintileri de yasaq etildi, şeer kirişlerinde blokpostlar quruldı. Razvojayev, cumaaqşamı, aprelniñ 2-nden, itibaren şeerde özüni tecrit etüv rejimini bozğanlar içün ceza sanktsiyaları işletilecek.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
