Qırımda apiske alınğan Azatlıq Radiosınıñ (Qırım.Aqiqat leyhası) ştattan tış hadimi Vladislav Yesipenkonıñ ömür arqadaşı Yekaterina Ukraina Tış işler nazirligi ve Ukraina prezidenti Volodımır Zelenskıyden yardım istedi. Bu aqta qadın martnıñ 19-nda Kyivdeki matbuat konferentsiyasında haber etti.
«Qırımda qanunsız tutulğan Qırım.Aqiqat leyhasınıñ jurnalisti Vladislav Yesipenkonıñ apayı olam. Aqayımnıñ tutuluvı qanunsız ola, çünki Vlad Qırımda jurnalist faaliyetinen oğraştı. Bütün qurulışlar, bütün demokratik memleketler bunı qabul ete. Ukraina vaqtında anda yaşağanımız içün Vlad Qırımğa barıp kele edi», – dep tarif etti Yekaterina.
Onıñ aytqanına köre, Yesipenkolar qorantası işğalden soñ 2015 senesi Qırımdan ketti.
«Vlad jurnalistikanen çoqtan tanıştı, bu bir hobbi kibi edi. Amma istegeni kibi oğraşmağa vaqtı yoq edi. Professional jurnalist degildir», – dep tarif etti Yekaterina Yesipenko.
Onıñ qayd etkenine köre, Vladislav Yesipenko «Qırımda olğan adise-vaqialarnı aydınlatmaq borcu dep saydı ve bunıñ içün bütün imkânlarnı qullandı».
Yekaterina Yesipenkonıñ qayd etkenine köre, advokatlar vastasınen Vladislavğa qol tutqanını yetkizmege tırıştı, amma advokatlar onı daa körmedi.
«Bizge yardım ete bilecek ve Vladislav Yesipenkonıñ azat etilüvini yaqınlaştıracaq er keske muracaat etmege isteyim. Ukraina prezidenti, ombudsmenler, Tış işler nazirligi, halqara teşkilâtlarğa. Bizge yardım ete bilecek er kesten yardım isteyim», – dep qoştı Yekaterina.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.
