Link açıqlığı

Saatnıñ esas haberi

Qırımda apiske alınğan Edem Bekirovnıñ ömür arqadaşı aqayınıñ ayatı telükede olğanını bildire


Edem Bekirov
Edem Bekirov

Qırımda Rusiye akimiyeti tarafından apiske alınğan Edem Bekirovnıñ ömür arqadaşı Gülnara Ukraina ve dünya cemaatçılığını hasta aqayını qurtarmağa çağıra.

Bu aqta o, yanvarniñ 2-nde Facebooktaki muracaatta bildirdi.

«Diagnozı olğan ve ekimlerniñ qararı çıqarılğan, adam aqıllı tedaviylevi yapılmağan, talillerniñ neticeleri kontroli esasında tedaviylevi tüzetilmegen hasta adamnıñ ayatı telükede: yürek-damar sisteması içün telükeler (tekrar infarkt ya da eñ beteri – keskin koronar ölüm), sağ baldırındaki yaranıñ qapanmaması septik esnasqa yol aça bile, bunıñ neticesi ise ölüm olması mümkün. Edemni qurtarmağa yardım etiñiz. Aqayımnıñ apiste tutulması onıñ içün ölüm fermanıdır», – dep yazdı Bekirova.

Onıñ aytqanına köre, Bekirov daimiy sürette baqılmalı ve tibbiy yardım körmeli. Amma mabüsniñ alı fenalaşqan soñ apiste tutulğan 17-inci künde advokatlarnıñ muracaatı esasında Rusiye cemaat mustaqil komissiyasınıñ azaları Edemge barıp, onı Aqmescitteki Semaşko hastahanesine yolladı.

«Kamerağa qaytqan soñ alâ daa ne ekim, ne emşire, ne advokatlar oña kirsetilmedi. 2018 senesi dekabrniñ 21-nden berli aqayımnıñ alı aqqında bir şey bilmeyim», – dep bildirdi Bekirovnıñ apayı.

O, Qırımda Edem Bekirov tutulıp apiske alınğan soñ oña ve qorantasına qoltutqan insanlarğa teşekkürler bildirdi.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.

Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

XS
SM
MD
LG