Qırımdaki apishanelerde Rusiye akimiyeti tarafından siyasiy ve diniy sebeplerden taqip etilgen eñ az 180 Ukrayina vatandaşı buluna. Bu aqta ''Kremlniñ siyasiy mabüsleri: Rusiye apishanelerinde tutqan ukrayinalılar ne yapa?'' matbuat konferentsiyasında Qırımuquq qoruyıcı gruppasınıñ idare yolbaşçısı Olğa Skrıpnık bildirdi.
''Rusiyeniñ büyük istilâsı başlağanından berli Qırım cenüpteki vatandaşlarımız içün apishanege çevirildi. Olarnı hırsızlay ve deşetli şekilde işkencege oğratqan ediler. Qırım territoriyasına qanunsız sürgünlikniñ ilk adiselerini 2022 senesi mart ayında qayd etken edik, o vaqıt Aqmescit SİZO-sına cenüpten insanlar pek yaramay alda kelmege başladı. Aynı seneniñ yazında ekinci, soñra üçünci SİZO peyda oldı'', - dep bildirdi Skrıpnık.
Qırım uquq qoruyıcı gruppasınıñ idare yolbaşçısı Olğa Skrıpnık qayd etti ki, "apisliler sayısı arta, amma vatandaş esirlerini, şu cümleden Qırımnıñ siyasiy mabüslerini azat etüv mehanizmleri şimdilik yoq". Skrıpnıknıñ fikirince, bu meselege halqara seviyede yeterli diqqat berilmey.
Daa evel Qırım uquq qoruyıcısı Lutfiye Zudiyeva ''Suspilne Krım'' saifesinde bildirgenine köre, uquq qoruyıcılar Rusiye apishanelerinde tutulğan qırımlı siyasiy mabüslerni qorçalamağa tırışmalı, çünki şimdilik olarnı deñiştirmek ya da azat etmek imkânları yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
