İlhaq etilgen Qırımda apis cezasına mahküm etilgen ve qomşu Rusiyeniñ Stavropolskiy ülkesiniñ koloniyasında tutulğan Ukraina vatandaşı Gennadiy Limeşkonıñ Rusiye sağlıq alı fenalaştı. Bunı Ukraina Yuqarı Radası insan aqları vekâletlisi Lüdmila Denisova haber etti.
“Qanunsız surette apis cezasına mahküm etilgen Ukraina vatandaşı Gennadiy Limeşkonıñ sağlıq alı fenalaştı. Berilgen malümatqa köre, Gennadiy Limeşkoda teri problemaları başlandı, elleri, tirsekleri ve ayaqlarında yaralar peyda oldı. Bundan ğayrı ayaqlarında ağırtqan eşkenler çıqa. Amma, sağlıq problemalarına baqmadan, müessise müdiriyeti, Ukraina vatandaşınıñ ihtiyacı olğan tibbiy yardımnı bermey”, – dep qayd etti Denisova.
Denisovanıñ aytqanına köre, bu azatlıqtan marum etilgen yerlerde tutulğan mahkümlerge kefalet etilgen halqara davranış standartlarğa zıt kele.
Lüdmila Denisova Rusiyede insan aqları vekâletlisi Tatyana Moskalkovağa muracaat etken. Rusiye zenaatdaşından ukrainniñ tolu tibbiy baqıluv yapılmasına ve kerekli tibbiy yardım kösterilsine yardım etmesini istegen.
Gennadiy Limeşko 2017 senesi avgust ayında yaqalanıldı. 2018 senesi mayıs ayında “Qırım Cumhuriyetiniñ Sudaq mahkemesi” onı apis cezasına mahküm etti. Ukrain patlıyıcı maddeler yapuvı ve saqlap tutuvınen qabaatlanıldı.
