Qırımda apis cezasına mahküm etilgen vatandaş jurnalisti İrına Danılovıç Krasnodarğa etap etilecek. Bunı iyülniñ 14-nde Ukrayina Yuqarı Radasınıñ insan aqları vekâletlisi Dmıtro Lubinets bildirdi.
"Qanunsız sürette 7 yıl apis cezasına mahküm etilgen İrına Danılovıç iyülniñ 17-nde vaqtınca işğal etilgen Qırımdan Krasnodarğa etap etilecek. Aynı zamanda sağlıq alı fenalaşqanı ve tibbiy yardımğa istiyacı olğanını Aqyamescit SİZO-sınıñ müdiriyeti diqqatqa almay", - dep yazdı Lubinets.
Evel Bir sıra uquq qoruyıcı teşkilât Rusiye akimiyetinden Qırımda apis cezasına mahküm etilgen vatandaş jurnalisti İrına Danılovıçnı azat etmesini talap etti, Ukrayinanı ise onı deñişüv cedveline kirsetmege ve Rusige etap etilmesine yol bermemege çağırdı.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
