İşğal etilgen Qırımda "casuslıq" qabaatı ile apis cezasına mahküm etilgen Yañı Kahovkadan jurnalist Sergiy Tsıgipanıñ mudafaası buña qarşı istinaf etmek niyetinde. Bunı "Suspilne Qırım"ğa apayı Olena Tsıgipa bildirdi.
Onıñ sözlerine köre, 62 yaşındaki aqayı içün böyle müddet ömürlik apis cezasıdır.
"Elbette, biz teslim olmaymız, küreşmege devam etemiz, qararnı istinaf etmege azırlanamız. Bu istinafnıñ Sergiyge yardım etip etmeycegini bilmeymiz, amma er alda etecekmiz", - dep qayd etti o.
Bundan ğayrı, o, aqayı Aqmescit SİZO-sında iskencelerge oğratılğanını bildirdi. Tsıgipa sağlıq vaziyeti aqqında açıq yazmay, amma apishaneden yazğan mektüplerde gizli şekilde bir şeyler añlata.
"Onıñ mektüplerinden birisini aldım. Esirlik, birinci satır "p" arfine, "aşalav, iskence". Netice şöyledir: anda o iskencelerge oğratıla", - dep añlattı o.
Oktâbrniñ 6-nda Kremlniñ nezareti astında olğan Qırımnıñ Yuqarı mahkemesi Yañı Kahovkadan jurnalist Sergiy Tsigipanı "casuslıq" qabaatı ile 13 yıl apis cezasına mahküm etkeni haber etilgen edi.
Sergiy Tsigipa – Yañı Kahovkadan jurnalist, faal ve ATO veteranı. Büyük cenkniñ başlamasınen göñüllilik ile oğraştı, Ukrayina destegine mitinglerde iştirak etti ve Rusiyeniñ cenüpteki areketleri aqqında yaza edi.
Keçken seneniñ mart ayından o esirlikte edi. Grajdanlıq serbestligi merkeziniñ malümatına köre, 2022 senesi fevralniñ 24-nde o "Yañı Kahovkanıñ malümat mudafaası" leyhasını teşkil etken edi.
Uzun zamandır Sergiy Tsigipanıñ bulunğan yeri bellisiz edi. Uquq qoruyıcılarnıñ malümatına köre, keçken seneniñ oktâbr ayında faal Aqmescit SİZO-sında tutulğan belli oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
