Qırımda iyülniñ 5-nden 8-ne qadar fevqulâde yanğın telükesi aqqında tenbileyler. Bu aqta Qırımdaki Rusiye Fevqulâde vaziyetler nazirliginiñ idaresi bildire.
Qurtarıcılar orman ziyaretlerini yasaqladı, maşinalarnıñ ormanğa kirmesi sıñırlana. Azbarlarda, bağça ve bostanlarda ocaq yaqmaq, çöplük, ot, yapraq yaqmaq yasaq etile.
Qurtarıcılarnıñ malümatına köre, yılnıñ başından Qırımda 58 orman yanğını oldı. Yanğınlarnıñ esas sebebi – insanlarnıñ ateşnen muqayt olmamalarıdır. Yanğın ile vaziyetni zorlaştırğan daa bir şey iklim şaraitleriniñ deñişüvi ola.
Yanğın ile küreş rejiminiñ bozuluvı içün Rusiye para cezaları 2 biñden 400 biñ rublege qadar ola. Bundan ğayrı, bozğanlarnı apis bekley.
Hatırlatamız, Qırımda iyülniñ 8-ne qadar anomal sıcaq olacaq, dep tenbileyler.
İyülniñ 3-nde Rusiye kontrolindeki Aqyar şeer yolbaşçısı vazifelerini eda etken Mihail Razvojayev orman ziyaretleri yasağını 21 künge uzattı.
