Ekinci cian cenki zamanlarınıñ uçucısı Amet-Han Sultan adına Qırım müzeyiniñ hadimleri adı, soyadı ve baba adı qarıştırıldı, dep bildire. Bu aqta Amet-Han Sultan doğğanınıñ 100 yılına bağışlanğan ilmiy-ameliy konferentsiyada müzey müdiresi Tefide Mühterem ayttı.
«Doğuv şeadetnamesinde Amet Amet-han olaraq yazıldı. Amet-han – soyadı, adı – Amet. Amma o vaqıt Qırımda sovet akimiyeti şekillengen edi. Bütün memurlar şarqiy soyadlarnıñ hususiyetlerini bilmey edi, ve yañlışlıqnen soyadını Sultan, adını Amet-Han dep yazğanlar. Soñra Amet-Han Sultan oldı. Aslında Sultan babasınıñ adıdır», – dep bildire müzey müdiresiniñ aytqanlarını TASS.
Onıñ aytqanına köre, yañı doğğanlarnı qayd etüv malümatları Qırımnıñ Devlet arhivi tarafından berildi. Mühterem, Amet-Han Sultan oktâbrniñ 20-nde doğdı, dep ayta. Onıñ bildirgenine köre, Amet-Han Sultan bu künni doğğan künü dep saydı. Uçucınıñ babası Qırımğa Dağıstandan keldi, dep ayta. Alupkada yerleşti, evlendi. Qalay ustahanesi bar edi, baqır ustazı eli, yip canbazlar sülâlesinden edi.
Aynı vaqıtta qırımtatar tarihçısı Gülnara Bekirova Amet-Han Sultan oktâbrniñ 25-nde doğdı, dep bildire.
Qırımtatar halqınıñ erbabı, Sovetler Birliginiñ eki defa qaramanı, uçucı Amet-Han Sultan 1920 senesi oktâbrniñ 25-nde Alupkada doğdı. Babası – lakets (doğma Dağıstandaki Tsovkra-1 avulından), anası – qırımtatarı. Em dağıstanlılar, em qırımtatarlar Amet-Han Sultannı milliy qaramanları dep sayalar. Amet-Han Sultan 603 cenk uçuşını kerçekleştirip, natsist Almaniyanıñ ava quvetlerine ait 30 uçaqnı şahsen ve 19 danesini taqım erkânında urıp tüşürdi. Uçucı 100 çeşit uçquçnıñ qullanuvını ögrendi, onıñ ücümleri 4237 saatnı teşkil etti. Amet-Han Sultan Tu-16 adlı uçqan laboratoriyada sınav uçuşını kerçekleştirgende elâk oldı. Moskvadaki Novodeviçye mezarlığında defin etildi. 2015 senesi mayısnıñ 14-nde Ukraina Yuqarı Radası «Aqmescit» ava limanına Amet-Han Sultan adını berdi. Onıñ adını Mahaçkala (Dağıstan, Rusiye) ava limanı da taşımaqta.
