Qırımnıñ Rusiye sağlıq naziri Aleksandr Ostapenko Qırımda martnıñ 24-ne qadar 62499 insanğa koronavirus aşısı yapıldı, dep bildirdi.
Bu aqta o, COVID-19 ile küreş operativ ştabınıñ toplaşuvında ayttı.
Ostapenkonıñ malümatına köre, Qırımda 72 aşılav noqtası ve 20 taqım çalışa.
«Bugünge qadar kelgen aşı sayısı 68 biñ 332 doz ola. Keçken afta 3100 doz aldıq», – dep bildirdi memur.
Ştab toplaşuvında qırımlılar çoqusı allarda ekinci kere aşığa kelmey, dep qayd etildi.
Martnıñ 17-nde Qırım akimiyeti 58 biñ insanğa koronavirus aşısı yapıldı, dep bildirdi.
Qırım akimiyeti yarımada sakinlerine koronavirusqa qarşı Rusiyeniñ «Sputnik V» aşısını yaptırmalarını teklif ete. Qırım sağlıq nazirligi, aşı «tek göñülli olğanlarğa» eki etapta yapıla, dep qayd etti. Qırımnıñ Nazirler şurası Rusiyeniñ koronavirus aşısı kimge yapılmalı, dep añlattı.
Martnıñ 23-nde işğal etilgen Qırımda 56 koronavirus hastası qayd etildi. Qırımda keçken künü beş insan COVID-19-dan vefat etti, pandemiya vaqtında vefat etkenlerniñ sayısı 1040 oldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
