Keçken künü Qırımda altı yañı koronavirus hastası qayd etildi. Bütün olar epidemiologik tahqiqat ve laborator skriningi neticesinde qayd etildi. Hastalar yuqunç hastahanelerine alındı, dep bildirdi Rusiye kontrolindeki Qırım yolbaşçısı Sergey Aksenov.
Qırım ve Aqyardaki Rospotrebnadzor idaresiniñ yolbaşçı muavini Dmitriy Krutikovnıñ Aqmescitteki matbuat konferentsiyasında bildirgenine köre, birer hasta Aqmescit ve Kezlevde, 4 hasta Saq rayonında qayd etildi.
Rusiye kontrolindeki Qırım sağlıq naziriniñ muavini Anton Lâskovskiyniñ malümatına köre, keçken künü bir COVID-19 hastası vefat etti.
«Hasta uzun zamandır ağır alda reanimatsiyada yattı», – dedi o.
Memurnıñ malümatına köre, 110 koronavirus hastası Qırımda tedaviylenmege devam ete, 5-iniñ alı ağır, 4-ü Aqmescitte ve 1 hasta Kezlevde reanimatsiyada buluna. Bunıñnen beraber, 80 insannıñ alı orta ağırdır, 25 hastanıñ alı bir qarar.
Umumen Qırımda 405 koronavirus hastası qayd etildi. 29-ı çetelden keldi, 74-ü – qomşu Rusiyeden. 285 insan tüzeldi. 12 COVID-19 hastası vefat etti. Aqyarda koronavirus qırğınlığı başlağanından berli 170 kişi hastalandı, üç insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
