Link açıqlığı

Qırımda adamlarnıñ ğayıp oluvı aqqında halqara teşkilâtlarğa bildirip, işğalcilerniñ riayet etüvini bekleyler.


Lana Dollenberg

Aqmescit – İşğal etilgen Qırımda Ukraina yaqlı teşebbüsçileri er ğayıp olmaqta. Bunıñ ile bağlı öz qasevetini Qırım Müftiyatı ve Meclis bildirdi. Uquq – qorçalayıcılar, tanılmağan cumhuriyetlerde insan aqlarınıñ temin etilüvi içün mesül olğan rusiyeli akimiyetniñ riayet etüvini bekleyler.


Keçken ay devamında Qırımda insan aqları boyunca çalışqan mahsus missiya «Ukrain evi» cemaat teşkilâtınıñ 3 azasınıñ qırsılanuvını qayd etti. Bunı Qırım.Aqiqatqa missiya vekili Andrey Krisko bildirdi.

Andrey Krisko
Andrey Krisko

Onıñ fikirince, bu adiseler «Qırımda ukrain ğayeli teşkilâtlarğa basqı yapmaq ve azalarnı tınçlandırmaq içün yapıla».


Krisko aytqanı kibi bu meselelerni Qırımda tertipni nezaret etken qurumlar çezmeli. «Adamlarnıñ ardı-sıra ğayıp oluvı – qorçalayıcı organlarnıñ iş seviyesini köstere. Qoruyıcı organlarnı bu vaqialarnı taqiq etmege mecbur etecek teşkilâtlarğa tesirni küçleştirmek kerek», - dep qayd etti Krisko. Bunen beraber, o emin, teşkilâtlar ukrain Tış işler Nazirligi ile birlikte çalışmalılar, nazirlik ise, özüniñ nevbetinde Moskvağa basqı etip, bu kibi vaqialarnıñ yüz bermemesini talap etmeli.

Meclis ve Müftiyat «rusiyeli» Qırımda adamlarnıñ qırsızlanuvı sebebinden qasevet çekeler

Adamlarnıñ ğayıp oluvı sebebinden, Qırım Müftiyatı Aqmescit ve Qırım Mitropoliti Lazarge muracaaat etti. Müftiyatta eminler: «Cinayetçilerniñ cezasız qalması çoq milletli Qırımda dinlerara munasebetlerniñ bozuluvına ketire bile».

Meclis ise admlarnıñ ğayıp oluvını «Qırımğa has olmağan havflı bir vaziyet» olaraq adladı ve «qorquzmaq maqsadında Qırım sakinlerine qarşı yapılğan zulum ve taqiqatnıñ neticesiz qalması – üküm etken akimiyetniñ insan aqlarnıñ eñ sade maddeleriniñ temin etip olamağanını» qayd etti.


Yaqında çıqqan muracaatında Meclis halqara teşkilâtlarğa, hususan, Birleşken Milletler Teşkilâtı, Avropada işbirlik ve havfsızlıq boyunca teşkilâtı ve diger bir sıra halqara teşkilâtlarını «imkânları olğanı qadar Qırımda yerli sakinlerge yapılğan zulumnıñ daa ziyade olmasına yol bermemege» çağırdı.

Enver Kadırov
Enver Kadırov

Qırım uquq-qoruyıcılar areketi informatsion bölüginiñ reberi Enver Kadırov Qırım.Aqiqatqa bildirgeni kibi, «cezasız qırsızlıq» adamlarnı qorquzmaq içün açıqtan-açıq yapıla. «İleride er kes kütleviy tedbirlerden saqınacaq ve faallik azlaşacaq», - dedi uquq qorçalayıcı.

Qırım missiyasınıñ koordinatorı, Rusiye prezidenti yanında vatandaşlıq cemiyetiniñ inkişafı ve insan aqları boyunca Şurasınıñ azası Andrey Yurov Qırım.Aqiqatqa aytqanına köre, bu malümat Şura ve Rusiye Federatsiyası ombudsmeni Ella Pamfilovağa yetkizdirildi.

Andrey Yurov
Andrey Yurov

«İlerideki adımlarımız insan aqlarınıñ bozuluvı meselelerinen oğraşqan ve mesülietli olğan qurumlarnıñ areketlerine bağlı olacaq. Er alda, vaziyetni nezaret altında tutıp, BMT-nıñ mahsus bölükleri ve diger qurumlarğa muracaat etecekmiz», - qayd etti Yurov.

İşğal etilgen Qırımnıñ resmiy akimiyeti yarımadada mühbirlerge yapılğan ücüm ve teşebbüsçilerniñ ğayıp oluv adiselerni iç bir izaat etmeyler.
XS
SM
MD
LG