İlhaq etilgen Qırımda koronavirustan daa bir ölüm qayd etildi. Bunı Qırımnıñ rusiyeli Sağlıq Nazirliginiñ statistika malümatı bildire. Böylece, COVID-19-dan ölgenlerniñ sayısı 19 oldı.
"Tibbiy baqıluv altında 984 adam buluna, olardan 12-si evde közetile, hastahanelerde 725 adam baqıla, observatorlarda 247 adam buluna", - denile müessiseniñ malümatında.
Tünevin Qırımda 42 yañı koronavirus adisesi qayd etildi.
Umumen, akimiyetniñ malümatına köre, Qırımda 1637 yañı koronavirus hastası qayd etildi. 82-si çetelden keldi, 112-si qomşu Rusiyeden kelgenler ve olarnen alâqada olğanlar. 1133 insan yahşı oldı, 18 hasta koronavirustan vefat etti.
Aqyarda 399 insan koronavirus yuqunçına oğradı, 323 kişi tüzeldi, 11 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
