Qırımda ağır koronavirus ve hastahaneden tış pnevmoniya hastalarınıñ sayısı 60% arttı, dep bildirdi iyünniñ 30-nda Qırımnıñ Rusiye sağlıq naziri Aleksandr Ostapenko COVID-19 ile küreş operativ ştabınıñ toplaşuvında.
«Qayd etmege isteyim ki, ciddiy bir artış oldı – ağır ve pek ağır alda bulunğan 60% hasta. Bugünki künde, 120-130 hasta olsa, endi 224 hasta bar. 13-ü aqcigerlerni invaziv suniy avalandıruvda, 64-ü aqcigerlerni invaziv olmağan suniy avalandıruvda ve 794 hasta oksigen ala», – dedi Ostapenko.
Hatırlatamız, Qırımdaki Rospotrebnadzor idaresiniñ yolbaşçısı Natalya Penkovskaya Qırım ve Aqyarda koronavirus hastalarınıñ sayısı artqanını qayd etti. Qırımnıñ Rusiye yolbaşçısı Sergey Aksenov yarımadada yañı lokdaun olacaq, dep qorqa.
Keçken künü Qırımda aman-aman 300 yañı COVID-19 hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
