Tünevin Qırımda 97 yañı koronavirus hastası qayd etildi. Bu aqta aprelniñ 13-nde saba Qırımnıñ Rusiye yolbaşçısı Sergey Aksönov Facebook saifesinde bildirdi.
«Aprelniñ 12-nde Qırımda 97 yañı koronavirus hastası qayd etildi, 9-nıñ hastalıq alâmetleri yoq edi. Hasta olğanlarnıñ umumiy sayısından 72 adam tibbiy yardım içün muracaat etkende qayd etildi, 25 daa evel qayd etilgen hastalarnen alâqada oldı», – dep yazdı Aksönov.
Bir künde 110, bütün vaqıt devamında ise 35 813 hasta tedaviylengen
Onıñ malümatına köre, koronavirus yuqunçı tedqiqlerini yapqan cumhuriyetniñ bütün laboratoriyaları tünevin 337 insannı teşkerdi.
Evel Sergey Aksönov işğal etilgen Qırımda aprelniñ 11-nde 95 yañı koronavirus hastası qayd etildi, dep haber etken edi.
Rospotrebnadzor, Qırımnıñ yedi regionında koronavirus hastalarınıñ sayısı arta, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
