2019 senesi iyülniñ 8-ne qadar Rusiye işğal etken Qırımda 93 insan siyasiy ya da diniy taqip çerçivesinde azatlıqtan marum etildi. Bunı Qırım aq qorçalayıcı gruppasınıñ yañı cedveli köstere.
Aq qorçalayıcılarnıñ malümatına köre, 63 insan Rusiyede yasaqlanğan «Hizb ut-Tahrir» teşkilâtı ile alâqaları bar olğanında qabaatlandı, 13 insan «ukrain diversantları» davası», 3 kişi «Sentsov davasınıñ» mabüsleri ola, bir kişi «Tebliğ Cemaatı» diniy teşkilâtınıñ azası olğanında qabaatlandı, 8 insanğa qarşı ayrı cinaiy dava açıldı, 8 kişi «N.Çelebicihan batalyonına» alâqası bar olğanı içün taqip etile, 2 kişi Euromaydan iştirakçisi edi.
Hatırlatamız, mayısta aq qorçalayıcılar Qırımda siyasiy ya da diniy taqip çerçivesinde 86 insan azatlıqtan marum etilgenini bildirgen edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
