Qırımda oktâbrniñ 12-nde saba COVID-19 koronavirus yuqunçından vefat etken daa eki insan aqqında haber etildi, vefat etkenlerniñ umumiy sayısı 91 oldı. Bu aqta Qırımnıñ Rusiye Sağlıq nazirligi bildire.
Qayd etilgenine köre, 2777 insan tibbiy közetüv altında qala, 964-ü dinamik közetüv altında evde buluna, 1656 kişi hastahanede buluna, 157 insan observatorlarğa alındı.
Qırım ve Aqyardaki Rospotrebnadzor idaresiniñ malümatına köre, umumen 6010 COVID-19 hastası qayd etildi. 2394 insan Qırımnıñ tibbiy müessiselerinde tedaviylene, 3457 kişi tüzelgen soñ hastahaneden yiberildi. Epidemiya başlağanından 91 insan vefat etti.
Hatırlatamız, oktâbrniñ 11-nde Qırımda 148 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
