2023 senesiniñ 9 ayı içinde Rusiye quvetçileri Qırımda 57 tintüv, 154 yaqalav ve 165 sorğu keçirgen. Buña ait malümat Qırımtatar resurs merkezi tarafından yayınlanğan Qırımda insan aqlarınıñ bozulmasınıñ talilinde aks olunğan.
Bundan ğayrı Qırımtatar resurs merkeziniñ malümatına köre, 2023 senesiniñ ilk 9 ayı içinde yüz bergen tevqiflerniñ sayısı 182-dir.
"İşğalciler tarafından kerçekleştirilgen bozuvlarnıñ çoqusı tamır qırımtatar halqınıñ temsilcilerine ait. Bu yarımadada sistematik bir şey oldı", - dep qayd eteler merkezde.
2023 senesiniñ ilk 6 ayı içinde Qırımda 101 yaqalav, 140 tevqif, 104 sorğu ve 37 tintüv qayd etilgen. Bunıñ aqqında Qırımtatar resurs merkezi tarafından yayınlanğan işğal etilgen Qırımda insan aqları bozuluvınıñ talilinde yazıla.
2022 senesi dekabr ayında yañartılğan BM Baş assambleyasınıñ Rusiye ilhaq etken Qırımda ve Aqyarda insan aqları vaziyeti qararında «Qırımda sebepsiz tutuvlar, Qırımğa ve Qırımdan zornen avuştıruv», hırsızlav, «filtratsiya tedbirleri» takbih etildi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
