Sentâbr 19-ına qadar Qırımda 77 yañı koronavirus adisesi qayd etildi, dep bildire Qırımnıñ Rusiye yolbaşçısı Sergey Aksönov.
"Sentâbr 18-inde Qırım Cumhuriyetinde 77 koronavirus adisesi qayd etildi. 55-i tibbiy yardım içün muracaat etkende belli oldı, 16-sı daa evel hastalanğanlarnen alâqada oldı, 6-sı sağlam ealiniñ skriningi neticesinde belli oldı", – dep yazdı o, "VKontakte"de.
Umumen Qırımda, akimiyetniñ malümatına köre, 3 650 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
