Keçken künü Qırımda 76 yañı koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
«33-ü tibbiy yardım içün muracaat etkende belli oldı, 24-ü daa evel qayd etilgende hastalarnen alâqada oldı, 19-ı sağlam ealiniñ skriningi neticesinde belli oldı (2-si diger subyektlerden keldi)», – dep aytıla haberde.
Akimiyetniñ malümatına köre, umumen Qırımda 2347 yañı koronavirus hastası qayd etildi. 89-ı çetelden keldi, 124-ü qomşu Rusiyeden kelgenler ve olarnen alâqada olğanlar, 1779 hasta tibbiy yardım içün muracaat etkende belli oldı ve qayd etilgen hastalarnen alâqada oldı, 355 hasta sağlam insanlarnıñ skriningi neticesinde belli oldı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
