Tünevin Qırımda 75 koronavirus hastası qayd etildi, bir adam vefat etti, dep bildire Qırımnıñ Rusiye yolbaşçısı Sergey Aksönov.
"Sentâbrniñ 13-ünde Qırım Cumhuriyetinde 75 koronavirus adisesi qayd etildi. 35-i tibbiy yardım içün muracaat etkende belli oldı, 26-sı daa evel hastalanğanlarnen alâqada oldı, 13-ü sağlam ealiniñ skriningi neticesinde belli oldı, 1 adise Ukraina qıtasında ketirildi", – dep yazdı o, "VKontakte"de.
Ve Qırım Sağlıq Nazirliginiñ malümatına köre, yarımadada tasdıqlanğan koronavirus diagnozı ile daa bir adam vefat etti, böylece, pandemiya vaqtında Qırımda COVID-19-dan 42 adam öldi.
Umumen Qırımda, akimiyetniñ malümatına köre, 3 301 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
