Tünevin Qırımda yedi yañı koronavirus infektsiyası qayd etildi, bunı Facebookta Qırımnıñ rusiyeli başı Sergey Aksönov bildirdi.
Onıñ aytqanına köre, olardan beşi evel tasdıqlanğan adiseler boyunca epidemiyağa qarşı tebdirler keçirilgende qayd etildi, daa ekisi - sağlam adamlarnıñ laboratoriya skriningi yapılğanda belli oldı. Hastalarnıñ episi hastahanelerge qoyuldı, alâqa daireleri belgilendi, olarğa qarşı profilaktika tedbirleri keçirile.
Akimiyetniñ malümatına köre, Qırımda 546 koronavirus hastası qayd etildi, 36-ı çetelden keldi, 87-si qomşu Rusiyeden kelgenler ve olarnen alâqada olğanlardır. 16 COVID-19 hastası vefat etti. Aqyarda 185 insan hastalandı. 152 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
