Rusiye kontrolindeki işğal etilgen Qırım yolbaşçısı Sergey Aksenovnıñ bildirgenine köre, keçken künü yarımadada 55 koronavirus hastası qayd etildi. Bu aqta o, Facebook saifesinde yazdı.
«Avgustnıñ 23-nde Qırım Cumhuriyetinde 55 yañı koronavirus hastası qayd etildi. 19-ı tibbiy yardım içün muracaat etkende belli oldı, 20-si daa evel qayd etilgen hastalarnen alâqada oldı, 15-i eali skriningi neticesinde belli oldı, 1-i Ukrainadan (esas Ukrainadan – QA) keldi», – dep aytıla haberde.
Onıñ malümatına köre, işğal altındaki Qırımda 2064 koronavirus hastası qayd etildi. 86-sı çetelden keldi, 121-i qomşu Rusiyeden kelgenler ve olarnen alâqada olğanlar, 1548 hasta tibbiy yardım içün muracaat etkende belli oldı ve qayd etilgen hastalarnen alâqada oldı, 309 hasta sağlam insanlarnıñ skriningi neticesinde belli oldı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
