Tünevin Qırımda 40 koronavirus hastası qayd etildi, dep bildirdi Kreml nezaretindeki Qırım Sağlıq naziriniñ birinci müavini Olga Rastrigina sentâbr 15-inde koronavirus infektsiyasınıñ toqtatılması içün çalışqan ştabnıñ oturışında.
"40 adamnıñ diagnozı tasdıqlandı, hastahanede 1 121 adam tedaviylene. Olardan 23 hasta ağır alda, olardan üçü - aqciger avalandırması cihazına bağlı, yedisi - oksigen destegindedir", - aytıp berdi Rastrigina.
Umumen Qırımda, akimiyetniñ malümatına köre, 3 341 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
