Qırımdaki hastahanelerde pnevmoniyağa oğrağan 182 hasta buluna, 11-iniñ alı ağır. Dört koronavirus hastasınıñ da alı ağır, üçü reanimatsiyada buluna.
Bu aqta Rusiye kontrolindeki Qırım sağlıq naziriniñ muavini Anton Lâskovskiy Aqmescitteki matbuat konferentsiyasında ayttı.
«157 insandan (koronavirus hastasından – QA) 4-üniñ alı ağır, 3 hasta 7-nci Aqmescit şeer hastahanesiniñ reanimatsiyasında ve bir hasta Kezlev şeer hastahanesinde buluna», – dedi o.
Lâskovskiyniñ malümatına köre, 110 COVID-19 hastasınıñ alı orta ağır, 43 hastanıñ alı bir qarar. Qırımda 2356 insan koronavirus sebebinden tibbiy közetüv altında buluna.
Keçken künü Qırımda 6 yañı koronavirus hastası qayd etildi. Böylece, Qırımda 361 yañı koronavirus hastası qayd etildi. 26-sı çetelden keldi, 74 kişi qomşu Rusiyeden keldi. 11 insan vefat etti. Aqyarda 160 COVID-19 hastası bar, üç kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
