Qırımda keçken künü 381 yañı koronavirus hastası qayd etildi. Bunı Qırımnıñ Rusiye yolbaşçısı Sergey Aksönov haber etti.
«Hasta olğanlarnıñ umumiy sayısından 275 hasta tibbiy yardım içün muracaat etkende qayd etildi, 104 kişi daa evel qayd etilgen hastalarnen alâqada oldı», – dep bildire Aksönovnıñ aytqanlarını Qırım Nazirler şurasınıñ matbuat hızmeti.
Bir künde 3955 hasta tedayiylendi, bütün vaqıt içinde ise 50 094.
Qırımnıñ Rusiye yolbaşçısı Sergey Aksenov iyülniñ 26-nda koronavirus pandemiyası sebebinden yüksek seviyeli azırlıq buyruğına deñişmeler kirsetti. İşbu deñişmelerge köre, mektep talebeleri Rusiyede sport yarışlarında iştirak etmek içün yarımadadan çıqa bile.
İyülniñ 17-nde Qırımda koronavirus yuqunçınıñ tarqaluvınen bağlı yañı sıñırlavlar kirsetildi. Bundan evel Qırımda aman-aman er kün koronavirus hastalarınıñ sayısında antirekord qayd etilgen edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
