Qırımda keçken künü 365 yañı koronavirus hastası qayd etildi, 28-niñ hastalıq alâmetleri yoq, dep bildirdi yanvarnıñ 14-nde Qırımnıñ Rusiye başı Sergey Aksönov.
"Hasta olğanlarnıñ umumiy sayısından 256 adam tibbiy yardım içün muracaat etkende qayd etildi, 109 daa evel qayd etilgen hastalarnen alâqada oldı. Künde tüzelgenlerniñ sayısı 330 oldı, bütün vaqıt devamında 23 020 kişi", – dep yazıla bildirmede.
Qırımnıñ Rusiye sağlıq saqlav nazirliginiñ haber etkenine köre, tünevin 9 hasta COVID-19 koronavirus yuqunçından ölgen, pandemiya devamında ise episi olıp 622 adam.
“3354 insan (covid) ambulator tedaviylevde, 2993 kişi (covid ve pnevmoniya) hastahanede buluna eken, 5 insan observatorlarğa alınğan. Pandemiya başlanğanından berli Qırımda umumen 28545 COVID-19 hastası qayd etildi,23020 kişi tedaviylengen soñ yiberildi ”, – dep yazıla bildirmede.
Yanvarnıñ 13-nde Qırımda 213 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
