Qırım ilhaqınıñ başından berli 307 siyasiy mabüs ve cinaiy davalar boyunca taqip etilgen şahıs qayd etildi, olardan 206 - qırımtatar halqınıñ vekilleri. Bunı Qırımtatar Resurs Merkezi bildire.
Berilgen malümatqa köre, taqip etilgenniñ statusına köre bu kategoriya beş qısımdan ibaret:
- 150 kişi (olardan 99-ı qırımtatar) mahküm etilgen ve koloniyada cezasını çekeler;
- 35 kişiniñ (olardan 20-si qırımtatar) sıñırlavı ya da sınav müddeti bar;
- 35 kişi (olardan 26-sı qırımtatar) SİZO-da buluna;
- 54 kişi (olardan 34-ü qırımtatar) azat etilgen;
- 33 kişi (olardan 27-si qırımtatar) taqip etile.
Daa evel QMC bildirgenine köre, 2023 senesi işğal etilgen Qırımda eñ yüksek seviyeli beden ve ruhiy sağlıq aqqı bozulğan eñ azından 52 adise qayd etildi, 43-ü qırımtatarlarğa nisbeten. 2022 senesiniñ aynı devirinde 36 bozuv qayd etildi, 2021 senesi ise 135.
Merkezniñ yolbaşçısı Eskender Bariyev bildirdi ki, 2023 senesi Qırımda uquq qoruyıcılar 173 yaqalanuv, 65 tintüv, 217 tevqif, 186 sorğu, em de adaletli mahkeme aqqınıñ ve 50-den ziyade sağlıq aqqınıñ bozuluvı ile bağlı aman-aman 300 adise qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
