Qırımda işğal devamında 301 adam siyasiy sebeplerden taqip etildi, olardan 202-si qırımtatardır. Bunı Qırımtatar resur merkezi haber ete.
Aynı zamanda Merkezniñ malümatına köre, 147 kişi mahküm etilgen ve cezahanelerde "cezasını" çeke, olardan 99-ı qırımtatardır
Uquq qoruyıcılarnıñ qayd etkeni kibi, 34 adamğa sınav müddeti ya da sıñırlav tayin etilgen, olardan da 19-ı qırımtatardır.
35 siyasiy mabüs SİZO-da tutla, olardan 24-ü qırımtatardır.
Evel Rusiyeniñ nezareti astında olğan Kefe mahkemesi 37 yaşındaki yerli sakinni içtimaiy ağlarda RF ordusını "itibardan tüşürüv" maddesi ile 1,5 yıl apis cezasına mahküm etkeni belli oldı.
Bir yıl ve 9 ay içinde Qırımdaki Rusiye mahkemeleri Rusiye ordusını "itibarsızlaştıruv" maddesi ile 472 memuriy qarar çıqarğanlar. Bunı "QırımSOS" uquq qoruyıcı teşkilâtınıñ talilcisi Yevgen Yaroşekno bildirdi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
