Keçken künü Qırımda 251 koronavirus hastası qayd etildi, 10 kişiniñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov.
«204 hasta tibbiy yardım içün muracaat etkende qayd etildi, 47-si daa evel qayd etilgenlernen alâqada oldı. 12 374 insan tüzeldi», – dep aytıla içtimaiy ağlardaki haberinde.
Qırımnıñ sağlıq nazirligi bergen soñki malümatına köre, pandemiya vaqtında 307 kişi koronavirustan vefat etti.
Yılnıñ başından Aqyarda 4549 insan yañı koronavirus yuqunçına oğradı, 4101 kişi tüzeldi, 129 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
