Qırımda 2024 senesi Rusiye quvetçileri 45 qanunsız tintüv keçirdi, dep bildire "KrımSOS" aq qorçalayıcı teşkilâtı.
Aq qorçalayıcılar derc etken malümatqa köre, 15 tintüv İyegova Şaatları, 10 tintüv qırımtatarlarnıñ evlerinde keçirildi, olarnı soñra "Hizb ut-Tahrir" ile alâqası olğanında qabaatladılar, 4 tintüv - jurnalistlerde ve daa 4 tintüv qırımtatar milliy areketiniñ veteranlarında keçirildi.
"Bundan da ğayrı, 2024 senesi saban ayında Qırımda işğalniñ 10 yılı içinde keçirilgen tintüvlerniñ üçünci dalğası olıp keçti. O künü Rusiye quvetçileri 10 qırımtatarnıñ evinde tintüv keçirdi. Er kesni Rusiyede terroristik olaraq tanılğan "Hizb ut-Tahrir" teşkilâtına alâqası olğanında qabaatladılar. 9 insan yaqalandı ve daa bir kişi bir sıra hastalığı sebebinden ev apsine alındı", — dep aytıla haberde.
Aq qorçalayıcılarnıñ qayd etkenine köre, "qanunsız tintüvler şahsiy ve aile ayatı ve mesken aqqını boza". Çoqusı allarda olar qanunsız sebeplerden sebepsiz küç qullanıp ve yasaq etilgen edebiyat, silâ, narkotik maddeler ya da Rusiye quvetçileri tarafından Qırım sakinlerine sıq-sıq berilgen diger delillerni tutıp alıp yapıla. "KrımSOS" yazğanına köre, böyle areketler çoq balalı qırımtatar qorantalarına tesir ete. Bundan da ğayrı, babasını tintüv ve apiske aluv esnasında balalarğa nisbeten insaniyetsizlik alâmetleri ola bile.
Daa evel Qırımtatar resurs merkeziniñ insan aqları bozuluvı talilinde, 2024 senesi işğal etilgen Qırımda 61 tintüv qayd etildi, 35-i qırımtatarlarnıñ evlerinde keçirildi, dep bildirilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
