Rusiyeniñ Ukrayinağa tam mıqyaslı istilâsı başlağanından berli, işğal etilgen Qırım sakinlerine qarşı Rusiye ordusını itibardan tüşürgenleri içün 1242 "memuriy dava" açıldı. Bu aqta Ukrayina prezidentiniñ Qırım Muhtar Cumhuriyetindeki temsilciligi bildirdi.
Müessise qayd etkenine köre, Rusiye akimiyeti "diskreditatsiya" maddesini Qırımda Ukrayina vatandaşlarını taqip etmek içün qullana:
- arbiy ifadeler
- içtimaiy ağlarda Ukrayina devlet bayrağınıñ resiminiñ derc etilmesi
- yarımadanı Ukrayinanıñ işğal etilgen toprağı dep adlandırmaq ıntıluvları
- Ukrayinağa qol tutqan laflar
- "Ukrayinağa şan-şeref!" şiarınıñ aytılması
- Rusiye arbiyleriniñ Ukrayina toprağında yapqan arbiy cinayetlerini takbih etüv.
Yanvar ayınıñ soñunda Rusiye Federatsiyası nezaretindeki Kefe şeer mahkemesi yerli sakinni "ruslarnı öldürmege çağırğanı" içün eki buçuq yılğa üküm etti.
Rusiyede ve onıñ tarafından işğal etilgen topraqlarda quvetçiler Ukrayina tarafını tutqan sakinlerni taqip eteler. Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "itibardan tüşürgenleri" içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
