Qırımda Rusiye işğali devam etken vaqıt içinde, 2014 senesine qadar faaliyet köstergen 10 biñ cemaat teşkilâtından 3392 qaldı, dep tarif etti "Suspilne Krım"ğa #LiberateCrimea halqara kampaniyasınıñ faali.
Faalniñ malümatına köre, qalğanlarnıñ çoqusı veteranlar, arbiy-vatanperver, bala ve sport teşkilâtları ola. Qırım yarımadasında siyasiy mabüsler ve Qırımtatarlarnı qorçalağan bir qaç mustaqil cemaat teşkilâtı, "Qırım" mustaqil gazeti ve gizli gruppalar qaldı.
Onıñ malümatına köre, Qırımda cemaat faaliyeti Rusiye akimiyeti ve quvetçileriniñ sert nezareti altında buluna.
"2014 senesine qadar Qırımda on biñden ziyade qayd etilgen cemaat teşkilâtı bar edi, şimdi olarnıñ sayısı üç biñden biraz ziyade. Qırımnıñ Rusiye işğaliniñ on ekinci yıllığına cemaat faaliyeti veteranlar, Rusiyege qoltutqan arbiy-vatanperver, bala ve sport teşkilâtları tarafından taqdim etilgenini qayd etmek mümkün. Yani, Qırımda kerçek vatandaş cemiyeti aman-aman yoq, akimiyetniñ tam nezareti altında olğan Ticariy olmağan teşkilâtlarınıñ butaforiyası bar, olar, asılında, üçünci sektor degil, akimiyet organlarınıñ ilâveleridir", — dep tarif etti faal.
Bunıñ ile o, Qırımda mustaqil vatandaş faaliyeti qısmen saqlanıp qalğanını qayd etti.
"Bu yerde kerçek üçünci sektor yoq dep aytmaq mümkün degil. Qırımlı aq qorçalayıcı advokatlar ve siyasiy mabüslerniñ tuvğanlarınıñ küçlü birligi "Qırım birdemligi" bar, Qırımtatar halqında ürmet etilgen muarriri Bekir Mamutov olğan mustaqil "Qırım" gazetası bar, gizli gruppalar bar, şunıñ içün repressiyalar dalğasına baqmadan, işğalciler mustaqil vatandaş cemiyetini bütünley yoq etip olamaylar", — dep bildirdi faal.