Qırımda koronavirus hastalarını baqqan 600 ekimden 168-i COVID-19nen hastalandı.
Bu aqta Qırımnıñ Rusiye sağlıq nazirligi «İnterfaks» Rusiye agentligine bergen cevabında bildirdi.
«COVID-19 yañı koronavirus yuqunçı olğan şahıslarnıñ Federal sicili malümatına köre, Qırım Cumhuriyetinde 168 ekim hastalandı, üçü vefat etti», – dep bildirdi müessise.
Berilgen malümatqa köre, şimdi 584 ekim COVID-19 hastaları içün 1929 yer açılğan 14 müessisede çalışa.
«Eñ yaqın vaqıtta üç hastahanede daa 100 yer qoşmağa planlaştırıla», – dep ayta müessise.
Keçken afta Rusiye kontrolindeki Qırım sağlıq naziri Aleksandr Ostapenko bildirgenine köre, yarımadada ekim qıtlığını qapatmaq içün qomşu Rusiyeden tibbiyet hadimleriniñ kelmesi beklenile.
Keçken künü Qırımda 161 koronavirus hastası qayd etildi. Umumen Qırımda epidemiya vaqtında 9816 COVID-19 hastası qayd etildi, 5469 insan tüzeldi, 142 hasta vefat etti. Umumen yılnıñ başından Aqyarda 2557 insan yañı koronavirus yuqunçına oğradı. 1630 kişi tüzeldi, 69 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
