Keçken künü Qırımda 16 yañı koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
«8-i qırğınlıq ile küreş tedbirleri, 2-si sağlam insanlarnıñ skriningi, 5-i tibbiy yardım içün muracaat etkende qayd etildi ve 1 hasta çetelden keldi», – dep yazdı o, Facebookta.
Aksenovnıñ malümatına köre, umumen Qırımda 831 yañı koronavirus hastası qayd etildi. 41-i çetelden keldi, 99-ı qomşu Rusiyeden kelgenler ve olarnen alâqada olğanlar. 635 insan tüzeldi, 31 kişi vefat etti (11-i COVID-19-dan).
Aqyarda 257 insan yañı koronavirus yuqunçına oğradı. Al-azırda 44 insan hastahanede buluna. 200 kişi yahşı oldı, 5 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
