Qırımda tünevin 15 yañı koronavirus adisesi qayd etildi. Bunı Qırımnıñ rusiyeli başı Sergey Aksönov haber etti. Onıñ malümatına köre, hastalarnıñ 10-u - Saqta, üçü - Kezlevde, ekisi - Aqmescitte.
Qırım ve Aqyar boyunca Rospotrebnadzor idaresi başınıñ müavini Dmitriy Krutikov qayd etkeni kibi, hastalarnıñ arasında ekimler ve balalar bar.
"14 adise - bu simptomsız hastalar, birisi - köterilgen sıcaq ile hasta. Saq rayonında 10 adam, olardan 5-i - eski merkezden ekimler, 5-i - ekimlerniñ balaları. Kezlevde üç adise qayd etildi, olardan birisi - qartlar eviniñ sakini, ekisi - Kezlev şeer hastahanesiniñ bala infektsiya bölüginiñ ekimleri. Aqmescitte eki adise qayd etildi, hastalarnıñ COVID hastahanesine qoydılar", - dedi o.
Böylece, Qırımda 314 koronavirus hastası qayd etildi. 25-i çetelden, 31-i qomşu Rusiye regionlarından keldi, 9 adam vefat etti. Aqyarda - 147 COVID-19 adisesi qayd etildi, eki adam öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
