Tünevin Qırımda 12 yañı koronavirus adisesi qayd etildi, bildire rusiyeli Qırım başı Sergey Aksönov.
"Olardan 4-ü - adamlar tibbiy yardımğa muracaat etkende qayd etildi, daa 4-ü - evel tasdıqlanğan hastalarnen alâqada bulunğanlar edi, 2-si - saglam adamlarnıñ skriningi vaqtında belli oldı, 2-si - çetelden ketirildi", - yazdı Aksönov Facebook saifesinde.
Yerli akimiyetniñ bildirgenine köre, umumen Qırımda 1116 yañı koronavirus adisesi qayd etildi, Olardan 71-i - çetelden, 107-si - qomşu Rusiyeden ketirildi. Umumen 827 adam yahşı oldı, 14 hasta koronavirustan vefat etti. Aqyarda koronavirus hastalığına 335 adam oğradı, 253 adam yahşı oldı, 6 adam vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
